Miyaad Haysaa Dawo Cimriga Dheeraysa?
Waxaa la sheegay in uu jiray Amiir ka talin jiray dhul wayn oo ay hoos yimaadaan magaalooyin iyo tuulooyin badan. Amiirkaasi waxa uu ku riyoon jiray in uu da'yar ahaado weligiis oo uusan gaboobin weligiis
Maalin maalmaha ka mid ah, waxa uu ku amray nin xikmad badan oo ku jiray wasiiradiisa in uu u keeno daawo cimriga dheeraysa. Waxa uu ballan qaaday in haddii uu arrintaas u hirgeliyo, uu siin doono abaalgud kasta oo uu codsado.
Haddaba, ninka xikmadda leh ayaa u baxay in uu raadsho dawo noocaas ah. Waxa uu tagay magaalooyin iyo tuulooyin badan, isaga oo waydiinaya haddii ay jiraan dawo ama cunto cimriga dheeraysa. Ugu dambayn, waxa uu maray tuulo, halkaas oo ay dadka tuulada kula taliyeen in uu tago buuro sare oo ay ku noolaayeen labo walaalo ah.
Markii uu gaadhay meeshaas, waxa uu arkay laba guri oo isku dhow. Guriga hore waxa deggenaa nin da'weyn, gurigiisuna waa uu burbursanaa, agagaarkiisana waxa ka muuqday fawdo iyo wax isdaba yaal. Waxa uu ku fadhiistay albaabka hore ee guriga isaga oo xiran dhar duugoobay. Ninkii xikmadda lahaa ayaa salaamay ninkii da’da weynaa, laakiin markuu codsaday in uu u hoydo, waxay ka soo hadashay cod haweeney gudaha ka leh:
"Ma haysano meel marti loo dhigo! Meel kale ka raadso hoygaaga."
Haddaba, ninkii xikmadda lahaa waxa uu u dhaqaaqay guriga labaad. Gurigaas waxa uu ahaa mid qurux badan oo hagaagsan, bannaankiisana waxa ku beermay ubaxyo iyo dhir qurux badan oo ay ka dhex shanqarayeen shinbiraha. Ninkii guriga deggenaa waxa uu ahaa nin da’yar oo farxadi ka muuqato. Waxa uu u soo dhaweeyay si diirran, isaga oo xitaa xaaskiisa ku yiri:
"Maanta waxaan leenahay marti!"
Subaxdii dambe, ninkii xikmadda lahaa waxa uu waydiiyay ninkii da'da yaraa sababta uu weli u yahay da'yar halka walaalkiis uu si xawli ah u gaboway. Ninkii ayaa qoslay oo yiri:
"Adigu khalad ayaad qaldan tahay! Anigu waxaan ahay walaalkiis weyn; isaga waxaan ka weynahay 20 sano."
Ninkii xikmadda lahaa ayaa aad ula yaabay. Waxa uu codsaday in uu ogaado sirta cimriga dheer ee ninkaas, isaga oo ballan qaaday in uu siiyo abaalgud kasta oo uu dalbado. Ninkii da’da yaraa ayaa yiri:
"Wax kasta waan kuu sheegi doonaa, laakiin marka hore aan qadada cuno."
Markii qadadii la diyaariyay, ninkii da’da yaraa ayaa xaaskiisa ku yiri:
"Waxaan rabnaa qare.
Fadlan u tag beeraha hoose oo nooga keen hal xabbo."
Haweeneydii ayaa tagtay beerta hoosaysa oo soo qaaday hal xabbo oo qare ah. Laakiin, markii ay keentay, ninkii ayaa dib u celiyay isagoo ku leh: "Maya, mid kale keen." Si deggan ayay hoos ugu dhaadhacday oo haddana hal xabbo oo kale keentay. Ninkii haddana dib ayuu u diray. Mar saddexaad ayay si kalgacal leh ugu noqotay oo soo siisay isla qarihii
hore.
Markaas kaddib ayuu furay oo qadadii lagu dhammeeyay.
Markii qadadii dhammaatay, ninkii xikmadda lahaa ayaa ku celiyay su’aashiisii. Markaas ayuu ninkii yiri:
"Sirta cimri dheeriddu waa xaaskayga. Tan iyo markii aan guursaday, waligay kama aan arkin wax xanaaq, muran, ama ixtiraam darro ka timaadda iyada. Mar kasta waxay ii muujisaa kalgacal, xushmad, iyo dulqaad. Ma ogtahay in aysan beertaydu lahayn qare kale oo keliya Saddexdii jeer ee ay hoos u dhaadhacday, isla xabbaddii ayay noo soo qaadaysay, laakiin weli ma muujin wax xanaaq ah."
Ninkii xikmadda lahaa ayaa ka yaabay xikmadda iyo dulqaadka xaaska ninkan. Waxa uu ogaaday in caafimaadka, cimriga dheer, iyo raaxada noloshu ay ku jiraan kalgacalka iyo naxariista lammaanaha wanaagsan.
Qor: Osman