Kooxaha fallaagada ee ka soo horjeeda Dowladda Suuriya ayaa la wareegay gacan ku haynta Magaalada Aleppo, ka dib weerar ballaaran oo Jimcihii ay ku soo qaadeen magaaladaasi.
Xoogagan ayaa gacanta ku dhigay magaalada labaad ee ugu weyn dalkaasi, ka dib markii Ciidamada Dowladda ay ku khasbeen in ay isaga baxaan magaaladaasi.
Militariga Suuriya waxay xaqiijiyeen in ciidamada laga saaray magaalada, si ay ugu diyaargaroobaan weerar ay dib ugu qabsanayaan.
Kooxda La socodka Xuquuqda Aadanaha Suuriya (SOHR) ee fadhigeedu yahay dalkaasi Ingiriiska ayaa sheegtay in Ciidamada Dowladda iyo maamulkii halkaasi ka jirayba ay banneeyeen magaalada.
Kooxaha fallaagada iyo taageereyaashooda ayaa ku dabaaldegay magaalada, waxaana la arkayay kooxahaasi iyagoo socod iyo gawaari ku maraya waddooyinka qaar ee magaalada.
Dagaalkan oo Arbacadii ka bilowday dalkaasi, si degdeg ahna ugu fiday goobo kala duwan oo dalkaasi ka mid ah ayaa lagu dilay In ka badan 300 oo qof, oo dad rayid ah ay ku jiraan.
Kooxaha dagaalka kula jira Dowladda Madaxweyne Bashar Al Assad ayaa sanadkii 2016 lumiyay gacanta ku haynta Aleppo oo sidoo kale loo yaqaano Xalab, ka gadaal markii Ciidamada Dowladda ay dib u qabsadeen.
Weerarkan ayaa noqonayo kiisii ugu horreyay ee ay mucaaradku dib ugu soo hujuumaan magaaladaasi, tan iyo bishii December ee sanadkaasi oo laga saaray.
Xoogaga Hayat Tahrir Al-Sham (HTS) oo gacan ka helaya kooxaha kale ee ay gacan saarka leeyihin ayaa sidoo kale sheegtay in ay gacanta ku hayaan dhammaanba Gobolka Waqooyi Galbeed Suuriya ee Idlib.
Xoogaga mucaaradka ayaa waxaa la socdo dagaal-yahanada uu Turkigu taageero, kuwaa oo ka barbar dagaalamaya xoogaga u muuqdo in sida weyn loo soo abaabulay.
Xoogagan oo in muddo ahba ku uruursanaa aagga Idlib ayaa si la yaab leh u gilgilaya goobaha ay weerarada ka wadaan.
Horumarka ay fallaagadu ka sameysay dagaalkan ayaa ku tusineysa in gacmo aan muuqan ay ku lug leeyihiin dagaalka.
Ma cadda, cidda hubka soo siisay dagaal-yahanadan, waxaase la sheegaya in dib u hubeyntooda ay iska kaashadeen Mareykanka, Israel iyo Turkiga.
Saddexda dal midna kama hadlin, haddii ay wax door ahi ku leeyihiin dhaqdhaqaaqyada ka socda dalkaasi iyo haddii kaleba.
Dagaalkan ayaa saddex iyo toban sano ka dib indhaha caalamka dib ugu soo jeediyay dalkaasi, waxaana uu ku soo aadaya, iyadoo muddooyinkanba ay xaaladda Bariga Dhexe ahayd mid kacsan.